Перайсці да змесціва

#Belaruski.Art

Натхнёныя нязгасным творчым духам беларусаў, раскіданых па ўсім свеце, мы сутыкаемся з актуальнай рэальнасцю: многія з гэтых праектаў абмежаваныя гарадамі, дзе жывуць іх стваральнікі. Рэпрэсіі ў роднай краіне, эміграцыя, а таксама складанасці з заробкам значна звужаюць гарызонты для распаўсюджвання іх мастацтва. Вось чаму мы задумаліся пра стварэнне ўнікальнай лічбавай платформы — месца, дзе беларускія творцы маглі б не толькі прадставіць свае праекты шырокай аўдыторыі, але і забяспечыць іх падарожжа па свеце.

“belaruski.art” прапануе прастору, дзе кожны творца, незалежна ад жанру — музыка, жывапіс, фатаграфія, тэатр ці майстар-клас па традыцыйным рамястве — зможа знайсці свайго гледача ці слухача ў любым кутку зямнога шара. Гэтая платформа стварае масты паміж творцамі і прадстаўнікамі беларускай дыяспары, спрашчае лагістыку, фінансаванне і адаптацыю праектаў пад мясцовыя ўмовы.

Мы імкнёмся зрабіць “belaruski.art” бяспечнай прасторай для культурніцкага абмену. Наша мэта — падтрымаць і пашырыць магчымасці беларускіх творцаў, прапанаваць ім новую аўдыторыю і перспектывы для самарэалізацыі і заробку.

У эпоху, калі свабода слова і творчасці ў Беларусі выпрабоўваецца на трываласць, “belaruski.art” выступае як глыток свежага паветра, даючы беларускай культуры магчымасць гучаць гучна і ўпэўнена па ўсім свеце. Мы верым, што менавіта такія праекты здольныя згуртаваць беларускую супольнасць, раскіданую па свеце, вакол агульнай ідэі захавання і развіцця нашай культуры.

Каманда:

Кантакт для сувязі:

  • Гэты адрас электроннай пошты абаронены ад спам-ботаў. Для яго прагляду ў вас павінен быць уключаны JavaScript у браўзэры.
Юлія Катаржынская
— медыя і культурніцкая менеджарка, прамоўца беларускай культуры.
Арганізоўвае івэнты розных напрамкаў, памераў і фарматаў. Куратарка і сябра аргакамітэта літаратурнага фестывала PRADMOVA. Адна з арганізатарак пікніка Letucien у Кракаве. Менеджарка шэрага культурніцкіх праектаў.
Марына Савіцкая
— беларуская радыёжурналістка, вядучая і арганізатарка музычных імпрэз.
У 2010-2020 гг. працавала на беларускім рок-радыё «Сталіца», дзе актыўна прасоўвала беларускіх артыстаў, у тым ліку і пачаткоўцаў. Вяла шматлікія культурныя імпрэзы, сярод якіх — міжнародныя фестывалі «Свята Сонца» і «Наш Грунвальд». У 2021 годзе Марына з’ехала ў Кіеў (Украіна), а ў 2022 — у Варшаву (Польшча). Там яна працягнула сваю дзейнасць: вяла мерапрыемствы, сярод якіх — міжнародны дабрачынны фестываль “Opor”, “Грай” (Варшава), “Летуцень” (Кракаў) і іншыя. У 2024 годзе разам з Аляксеем Ажогіным арганізавала першую ў эміграцыі беларускую музычную прэмію “Uwaga!”. Таксама прымала ўдзел у міжнародным праекце “Voices Across Borders”. У цэнтры дзейнасці Марыны — падтрымка беларускай культуры і музыкі непасрэдна.